Orioko ikasleek aukera aparta izan dute azken egunotan saharar herriaren kultura eta eguneroko bizimodua gertutik ezagutzeko. Maiatzaren 8an zabaldu zen erakusketa kultur etxean, eta maiatzaren 20ra arte egongo da ikusgai. Bertan, Saharako bizitza irudikatzen duten objektu ugari daude ikusgai: haimak, zur eta larruz egindako tresnak, jantziak, haurren jolasak eta bestelako elementu kultural eta erlijiosoak.
Ikasleek erakusketa bisitatu dute gidatutako saioetan, eta Saharako bizimoduaren xehetasunak ezagutzeko aukera izan dute zuzenean. Esperientziak jakin-mina piztu die, eta kultura aniztasuna, elkartasuna eta errespetua lantzeko parada eskaini du.
Erakusketa hau ez da soilik ikasteko baliabide bat izan; kultur transmisiorako eta herrien arteko zubiak eraikitzeko ekimen bizigarria ere izan da. Orioko ikasleak, benetan, kulturaz busti dira.
